Mat 18 | BJR | STEP | Mi-aukuanná miná faiqi námu Yísufuqoo anirée irámmirida qiqau. Innaarúna ququsaki yáfee úriqararafa máridanoo fee.

Matthew 18

Faiqi ánaaqiara foo reendeénirafa innaarúna ququsaki úriqararafa máriannoo.

(Mareekoo 9:33-37; Ruka 9:46-48)

1 Mi-aukuanná miná faiqi námu Yísufuqoo anirée irámmirida qiqau. Innaarúna ququsaki yáfee úriqararafa máridanoo fee. 2 Mifá iriséenoo faiqi ánaaqi moó miqóo máruna áaroofanoo aniroofanoo maréeqeenoo narí faiqi námu qámbaanai quqáseenoo qímanniminau. 3 Qinée kúqaa ánoona ufa ínni qímannimida. Ínnee sía óonu quándakinaqa sía kafáa ánaaqi ánaaqi kámmafinaqa innaarúna ququsaki sía fifáranoo. 4 Moó fannoo narí kai maa-kaqikaa faiqiára foora fifímandeenoo márinafa mifá innaarúna ququsaki úriqararafa máriannoo. 5 Yáfee moó fannoo qiní ufara iriséenoo quandáfinoo faiqi ánaaqi maaqáairana asasammásee áqoondikinafa miná faqa qiní faqa miqí kai ínoo qíqoondikiannoo.

Yísuna mandaaqásaannanakinaana faiqi ánaaqi mandáinainaki quqásainafa numóo máriannoo.

(Mareekoo 9:42-48; Ruka 17:1-2)

6 Faiqí moó fannoo qinísaa atooqée marí kaqikaa faiqina mandóosana uqafíqainanoo mi-faiqífa sáamurinanoo, mi-fasiqána mi-mandoosanná uqafíqeemari fasiqana miná numóo úriqaránoo máriannoo mandáinainaki máridanoo. Fáasai mi-fasiqáfa óoni firaatiá qumáreenoo narí anukaki ususéenoo nammáriki áqufinoo narí kai narí árinoofau narí numóo óorudupinoo máriqini. Mi-faiqi anaaqína mandá oosanna uqafíqainanóo mi-numoofá firaafá máriannoo. 7 Maa-maqánasaa mandá ainaina moómoo minakí máriannoo. Mi-manda ainainná áukuana áukuana sía taikáannoo káqi máriannoo, faiqí mara quqáidanoo. Minára numóo firaatia mári ifoo qídaqa qimudáo̱o qídaqa. Mandáinaina óosana óonu rarisáinafa mi-fasiqánaki faqa firaa numoo tiá mári ifoo qídaqa. Minára qinée qimudáoo qídaqa.

8 Aní ásauku fannoo fee, áiku fannoo fee aní ani rarisámeeqeenoo mandá oosanaki quqéemarinnana miná ateeká áqua. Áiku ásauku síainafa márira maqaki kéeqafinana amaná márinnaranoo. Aneenná áiku ásaukuara ámuqusinana káqi mandá oosana marasée mári inafa mifá náaruara márira idaki rafúseeqee áqusainafa sía amana márinnaranoo. Mandáikamminnaranoo. 9 Aní áfu aaqoo fannoo fee aní rarisámeeqee mandá óosanaki quqáidanoo fee miná díqi áqua. Anée moodáa afu aaqoo faqa káqi máriranaki kéeqarafa amaná márinnaranoo. Aiqáma afu aaqooqara káqi máridanoo aní rafúseeqee idáki áqusainana sía andeeqéennaranoo. Mandáikamminnaranoo.

Sipsípa ánaaqi auíanoo mári quandára ufa.

(Ruka 15:3-7)

10 Ínnee aufariaqa. Sía uqanna faiqi ánaaqi moó fannoo maaqírafa ákoo uqannaqáani. Ínnee mi-oosannára eeráiriaqa. Minára qímannimianaura. Innaarúna maqusai qangiroouqa maqásaaqaraa faiqi ánaaqi misá náadu náadu rakísinnimaqara qangiroouqa qiní innaarúnaindaraa qíkoona óorisaa kikíqidaqa nári faiqi ánaaqi maa-maqánasaaqaraasa rakísinnimaqaranara Ánutuna qímamidaqa miná óorisaa máridaqa. 11 (-) 12 Ínnee maaqíanna ufana nána iráranee írifaree. Faiqí moó miná sipsípa moómoo márida moodáannai qísauku fasiqa arusée márufanoo misákiqari moodáa kai auíanau. Misásaa rakísi maru fasiqafa aiqáma sipsípa anusáa súqu quqáseenoo misákiqari moodáa auíanoo márunara randárara finau. Qinée kúqaa ufee qída fee. Kúqaa, aiqáma sipsípasaa rakísi mari fasiqausa miqífaranoo. 13 Mi-fasiqáfa mi-sipsipána paqúrimáseenoo káaqa minára asasíannoo. Moómoo sía auíanoo máriasara mána mániannoo. 14 Miqí kai mándee qiní innaarúnai qikoofa faiqi ánaaqi moó kurídiranara ákooqaidanoo. Aiqáma uqanna káqi náaruara máriranara innaarúnai níkoofa áididanoo.

Aní ákaqaafasaa aní mandáikammamaqaina ufafa.

15 Aní aqoónafa aní mandáika mamaqáinana anée mi-fínnai óonuree narí mandóosanara qímamia. Inneeqára kai máriaqa sía moó fannoo mariani. Mifá aní ufa irisáinana dóo anée aneenná aqoónnana kafáa áqoondikina márinnaranoo. 16 Mifá aní ufa sía írinana anée Mooseena sándufamau fínana faiqí qaara fee moodáa fee nífiqeenana aqoónna finnai fúa. Misá maasá faqa aní mandáinaina qáfee fee qiaqéera, aní dadaaqiaqéera aní ufa ánoonaikianifeera. 17 Mifá misá ufa faqa sía írinana amaana máqaki kéeqeemariasa qímannimiaqa. Amaana máqaki kéeqeemariasa ufa sía írifaqa aamína máqannaara foora mámaqaa sía miná faqa ufa qía, mandá tákisa máree mária fasiqausára foora fidiaqaa mámaqa.

Moo áinainara Ánutunara innaaru qínanoo ámiannoo.

18 Qinée ánoona ufa ínni qímannimidaqa. Ínnee maa-maqánasaa moo áinainara iriséenana mandáikammíifoo qiafaqa qinée faqa innaarúnai miqí kai íqa mandáikammíifoo qianáura. Ínnee ámiqimmíifoo qiafaqa qinée faqa innaarúnai miqí kai íqa ámiqimmíifoo qianáura. 19 Qinée kaifáa moo úfa qímannimidaqa. Qaara fasiqa maa-maqánasaa maqásaaqaraa nána aináinaree moodáaqoo naundurá quqásee iráifanoo innaarúnai qiní qíkoofa mi-ainainná nímiannoo. 20 Yái fee qaaraqánda fee qaaramoó fee qiní dúquara iriséeqa súqiqa misá qámbaanai qeeqá faqa qumeé máridaqa ínniki márida dadaaqianáura.

Mandáinainira faiqiara quandára ufa.

21 Qímasoofanoo Peetooroofa aniréenoo qinau. Óo karaambáiqa náquma kari fee qiní qiqoónafa mandá óosana qíminaqee miná ákiaqara mínnáisaanauree. Moodáa qísauku taikásee dínni óonu qaara marasée kári fee mínnáisaanauree.

22 Yísufa qímaminoo qinau. Sía moodáa qísauku taikásee dínni óonu qaara marasée kari fee qídaqa. Moodáa fasiqa áiku ásauku taikásee moo fásiqa óonu moodáannai qísauku taikásee fasiqa áiku ásauku miqúmma kari aqoónnana mandá óosana ákiaqara minnáisaaneera qídaqa. Fíqaramásee moómoo kari minnáisaaneera qídaqa.

23 Minára qinée moo úfa qímamianaura. Innaarúna maqusa maaqímminoo máridanoo. Firaa rakisirafa moó márinau. Mi-rakisiráfa narí dadaaqí maru fasiqausa súqusee úfaasu nímiafanna munnimmana andeeqáanauree qímasee súqinau. 24 Súqusee iréemarufanoo misákiqari moó fannoo narí karaambáiqa munnimma moómoo fíqaramásee naríara firaa munnimma moómoo rafáaqafinau. 25 Mi-fasiqáfa sía amana narí karaambáiqa ámufanoo narí faiqi námu qímanniminau. Moosá miná ánaaqa faqa faiqi námufaqa nimisée ínnee minásaaqaraa feefauru maréeqee qímiaqa, mi-munnimmána ákiaqariani. 26 Mi-fasiqáfa iriséenoo ámuqusufanoo óorindari maqásaa rupáita máfufanoo qikí ráqaidanoo iranau. Óo qiní karaambáiqa, qiníara kásooínaqa qinée aiqáma aní munnimma ámianaura. 27 Miná karaambáiqa iriséenoo ámuqusufanoo miná áika tatúseenoo idukúseenoo quqáisanau.

28 Mi-dadaaqira fasiqáfa ráudamakufanoo maqúsai óoqureenoo aqoónna dadaaqira fasiqa qáfeenoo anukakí qumáreenoo qinau. Qinée munnimma káqikaana ámiafannana káqi káqi mara qímia. 29 Miqí qufanoo miná dadaaqímaru fasiqafa maqásaa áqufinoo reendeenámandee qinau. Óo qiníara kásoo ínaqa qinée aní munnimma ámianauree qímasoofanoo miná aqoónafa afeekaikámáseenoo mi-fasiqána karafúsaki quqánau. Qiní káqikaa munnimma qíminaqa idukúanee qinau. 31 Karafúsaki quqásoofaqa miná aqoónausa qáfoofanoo nímuqusa káaqa mandáikufaqa misá nári karaambáiqinnai óonuree aiqáma mifá áuqoo óosana óosanara qímamiqau. 32 Karaambáiqa fannoo iriséenoo miná dadaaqíra fasiqa áaramáseenoo qímaminau. Anée mandá dadaaqira fasiqa máriananoo. Anée qiní reendeenámasee qíma qímianaqa aní áika aiqáma tatú áqiqa. 33 Náqaa fee ifanee sía fee anée miqíkai ínana aneenná aqoónnanara ámuqusinanee. Qinée aníara miqúnandee iaqaana. 34 Miqí qímaseenoo áranaqoofanoo árira maqaki quqásee qinau. Misá miqóo aní áriisaifana kaifáa qiní firaa munnimma qíminaqa idukúanaura.

35 Yísufa mi-ufána qímaseenoo narí faiqi námu maaqí qímasee qímanniminau. Ínnee faqa sía ínneeqa niqoónausa ínneeqa naunduránnoo misá níkiaqara mi-aikána sía tatíqa aunífanoo qiní innaarúnai qíkoofa faqa miqí kai ínoo ínni áika sía tatúannoo.